歐聯D組焦點之戰，國際米蘭主場對賓菲加，上屆亞軍國際米蘭上輪首仗作客僅逼和皇家蘇斯達1比1，今仗返回主場不容再失，國米狀態出色，射手拿達路馬天尼斯瘋狂數胡，另一位前鋒馬古斯杜林亦頻頻貢獻助攻，兩人非常合拍，足以撕破賓菲加防線。加上國米近5仗歐聯主場取得4勝1和，主勝值博。■（周三凌晨3時開賽）
國際米蘭今季整體發揮更勝上季，目前排意甲榜首，前鋒拿達路馬天尼斯狀態着晒火，上仗聯賽下半場後備上陣都可以射入4球，非常誇張，國米上輪歐聯可以打和皇家蘇斯達，都係靠呢位阿根廷國腳入波，可見佢腳風極之順。
拿達路上仗轟4球弗爆
除咗拿達路馬天尼斯之外，新加盟嘅前鋒馬古斯杜林亦發揮重要作用，呢位法國國腳今季意甲已有4次助攻，包括上仗傳畀拿達路馬天尼斯射入。國米為求打開今屆歐聯勝利之門，勢必主攻，馬天尼斯同杜林肯定有大把表演機會。
葡超球隊賓菲加上屆歐聯打入8強，就係被國際米蘭淘汰，已經證明雙方實力有距離。賓菲加上輪歐聯即使有主場之利，但仍然0比2不敵薩爾斯堡，後防出現唔少錯誤，中堅安東尼奧施華更加因為領紅牌，今仗需要停賽，令球隊雪上加霜，造訪意大利，預料形勢唔樂觀，隨時再輸1場，最好選擇國際米蘭主勝。
